Euskalerriko Eskautak VEGA Kongresuan egon da: aniztasuna eta hausnarketa

Euskalerriko Eskautak federazioko eta Euskalerriko Eskautak Bizkaiako eta Arabako 25 pertsona inguruk MSC-k antolatutako VEGA Kongresuan parte hartu zuten, Hoyo de Manzanaresen (Madrilen). Taldeen ordezkariak eta delegazioetako taldeetako pertsonak elkarrekin aritu ziren, Estatu mailako beste federakuntza batzuekin batera egin den hausnarketa prozesuan.

Aurreko aste eta hilabeteetan pertsona horiek lanean aritu dira, eskaut mugimenduak datozen urteetan izango dituen ildoei begira erabakiak hartzeko. Ildo horien artean daude haur eta gazteen hezkuntza egitasmoa; Helduen Politika eta formakuntza; egiturak, antolakuntza eta gobernua; kudeaketa ekonomikoa; ebangelizazioa eta eskultismoak Elizan duen garrantzia; aniztasuna eta inklusioa; Ingurune Segurua; eta nortasuna eta ikusgarritasuna.

Hiru egunetan zehar, talde txikietan eta handian eztabaidan aritu dira, Estatuko beste eskaut federakuntza batzuetako ordezkariekin, arlo horietan jarraitu behar diren ildoak adosteko. Behin ildo horiek zehaztuta, Kongresuan bertan eta azken egunean egindako Asanblean bozkatu eta onartu ziren proposamenak, eta datozen urteetan garatuko dira.

Aukera ona izan da taldeetako eta delegaritzetako ordezkarientzat mugimenduaren aniztasuna ezagutzeko, Euskalerriko Eskautak mailan dugun funtzionamendua erakusteko eta beste errealitate batzuekin loturak egiteko. Datozen erronkei begira, adi jarraituko ditugu proposamenen garapenak.

Argazki guztiak ikusteko, sakatu hemen